【女生必看】Dashing Diva 人氣韓國美甲貼推介

女仔除咗衣著、髮型同化妝外，指甲都一樣需要好好保養同打扮。除咗搽普通指甲油外，做光療Gel甲外，依家仲多咗選擇，可以用美甲貼紙同甲片，啱晒唔想俾咁多錢整Gel甲又想成日換款嘅人。（小編就係咁）

市面上有好多美甲貼片同貼紙，當中人氣最高嘅當然係嚟自韓國嘅Dashing Diva！今次小編就推介幾款美甲貼俾大家，可以係屋企輕鬆幫自己嘅手指仔扮靚～

美甲貼片

美甲貼片真係好易用，只要揀好啱自己指甲形狀嘅甲片，撕開貼紙，對準指甲就可以貼落去，咁就大功告成啦！成個過程5秒就都唔洗 ，方便程度有10粒星！甲片太長的話記住貼完要用指甲鉗修剪一下，咁就冇咁刮手同埋可以keep耐啲。不過美甲貼片嘅一大壞處就係唔持久? 因為甲片上嘅黏貼啫喱只要濕水就會冇咁黏，所以建議臨瞓前先好貼甲片，俾一晚時間佢貼實你嘅指甲。以小編經驗，1個星期就會開始唔夠黏力，2個星期就甩晒嚕～

美甲貼紙

如果想避開洗幾次手就會甩嘅問題，小編就推介用美甲貼紙！（小編都係用緊美甲貼紙??）同貼片用法一樣，度好啱嘅指甲size 就可以撕落嚟貼上指甲，然後用包裝附送嘅指甲剉磨走多餘嘅貼紙部分，建議搽多層透明嘅指甲油，咁就可以更long-lasting~根據經驗，咁樣用美甲貼片至少可以貼一個月都唔甩！（小編同事試過兩個月仲未甩 XD）