智能家居風吹就吹左好耐，但相信而家香港嘅智能家居都仲係停留係BB班嘅階段，BB班即係點? 咪係買盞智能燈膽、買部可以用App遙距控制果D風扇、空淨果D咁囉。不過凡事都需要時間去適應同建立嘅，起步起得慢都好過試都唔試嘅。好喇，鳩嗡完畢，今日想同大家介紹嘅係一款叫Nanoleaf嘅智能燈膽，講Nanoleaf，大家可能未必知係乜，但如果大家睇到下面張圖，就應該有D印象。
睇完張相，係咪有少少印象，矛嘅都唔緊要，Nanoleaf 係一間科技同物聯網公司 (而家好似好多公司都咁樣幫自己定位)，佢地主力提供創新嘅智能家居解決方案 (但其實我睇佢網頁，都只係智能燈具為主) 而上面張相可以話佢哋嘅招牌作，透過唔同模組，等你可以因應自己屋企嘅設計需要去製定一個岩你心水同品味嘅智能燈組合 (講真係幾靚，但價錢都幾和味下)。或者品牌方都知道如果想搶佔市場份額，就需要有更具競爭性嘅產品，所以今次推出嘅 Essentials 系列智能燈膽，我第一反應係性價比非常好，作為首款支援 Thread (低延時及低功耗網狀網絡) 嘅智能燈具，Essentials LED智能燈膽定價可謂非常進取，只係賣HK$168，對比起其他市面上嘅智能燈膽如Philips Hue (好似HK480+)、小米 Yeelight LED (HK128)，HK168呢個價錢真心抵玩。
根據官方介紹，LED智能燈膽具有內置自然光韻律功能，可以自動係唔同時間提供人體最合適嘅色溫環境。同時，Essentials 智能燈膽擁有市場上最大嘅色溫幅度，可以係所有色溫環境下提供最光亮嘅白色燈光 (2,700 – 6,500K)，平均亮度為806流明及最高可達1,100流明。另外值得一提嘅係，呢款智能燈膽有獨特嘅外型，小斜方截半二十面體，就算唔用燈罩都幾靚。
除左智能燈膽，根據官方資料，今次Essentials 系列好似仲有燈條 (但我係Apple Store就仲未見有)，等之後有多D資料再同大家介紹下。
