睇完女小編尋日果篇 被世界遺棄 不可怕 個心真係up住up住咁，如果大家都想同女小編嚟個浪漫邂逅嘅話，不妨可以試下去酒吧碰下運氣 (不過以我所知嘅女小編，應該只係同我個名一樣，9up)。其實大家又唔洗好似女小編咁諗到咁灰嘅，話晒而家離聖誕仲有成個月，你絕對夠時間「脫單」嘅。以前就話因為資訊唔發達，識個人都要經三姑六婆過五關斬六將先識到，但而家，唔係我話，一部手機在手，不論年齡、身高、學歷、顏值….只要你肯花少少時間，一定搵到個岩你要求嘅 (嗱，先小人後君子，網上交友始終有一定風險，佢係真心定狗公，佢係賢妻定拜金，真係睇你彩數喇) 好喇，免責嘅聲明就講完喇，而家即刻介紹幾個app，希望大家可以成功脫單
Coffee Meet Bagel (簡稱CMB): CMB可以話係近年比較多人玩嘅交友app，每日官方都會根據你定嘅要求，派出佢認為符合你條件嘅對象，如果你見到覺得岩嘅就俾個LIKE，如對方都覺得你岩心水嘅，就叫成功match，之後你會有7日時間去同對方溝通，至於how far can go就真係who knows la。當然，除左每日等系統介紹外，你亦可以主動D，係佢search個介面尋找你覺得岩自己嘅另一半，不過講明主動出擊，就梗係要付出，你可以透過做唔同任務或課金去換取咖啡豆。
Tinder: 係外國好HIT嘅交友app，但同時亦有人話係約炮神器，係我層面，交友app就好似火藥咁，究竟你係拎佢嚟開山劈路，為人謀利，定將佢變成武器生靈塗炭，好睇用火藥果個人。Tinder嘅操作模式好簡單，入到去，系統會跟你要求俾一堆介紹你，覺得岩心水就唔記得FING左定FING右以表示興趣，當對方都覺得你OK，就會match。你亦可以課金成為Tinder Gold會員，呢個會藉其中一個好處就係可以睇到有咩人對你有興趣同埋可以俾你重新選擇，始終有時手快快唔小心FING走左個心儀對象嫁ma。
SweetRing: 玩法同CMB同Tinder差唔多嘅交友app，開左acct後，你需要進行FB認證，如果你係諗住用佢嚟做壞事嘅就要諗下喇。開左acct後，你可以係自己profile度set問題，睇下對方會好似我咁9up定認真答你嘅問題。另外，你仲可以set唔同嘅約會活動，睇下有冇志同道合嘅人想join。同CMB及Tinder有提供免費玩法唔同嘅係，SweetRing需要課金先可以同人傾到計 (我試時要，所以冇得同人傾，但女士用可能唔洗，之後叫女小編試下先) ，
Telegram: 同其他APP唔同，TG唔屬於交友軟件，佢本身既功能純係加密聊天，但同時，TG入面有各式各樣唔同既群組，正所謂，有人既地方，就可以識到新朋友。大家不妨根據自己嘅興趣入唔同嘅群組，咁就唔怕搵唔到個志同道合嘅另一半喇。
Heymandi: 聽聞係年輕一代比較常玩嘅交友軟件，同其他app唔同，Heymandi 主打匿名，即係唔需要upload相，唔需要打自己個名，入app時只係需要簡單打段字如「90後9upper」之後開始聊天，你入到去就會見到一堆寫左唔同嘢嘅人，你可以因為佢定嘅話題邀請聊天，如果佢覺得你岩嘅，你哋就成功match，但要注意嘅係，如果當對方離開左聊天後，你未必可以再搵返佢，所以如果覺得岩嘅請把握機會抄牌喇。
GoodNight: 先聲奪人可以話係呢個app嘅賣點，如果你自問把聲好聽，又唔鍾意隔住個mon打字嘅，GoodNight可以話係一個唔錯嘅選擇。同埋根據官方資料，因為要match返個app嘅名同定位，即係傾電話氹人訓覺，佢個app係每晚10點至凌晨4點係免費嘅，而配對成功，你會有7分鐘的限時交流時間，如果7分鐘後大家都覺得岩傾嘅就可以繼續傾落去，如果唔係嘅，你哋嘅緣份就只有7分鐘喇。
講真，交友app又點止上面幾款，你上Apps Store Google Play 係交友app section，上面嘅app可以話多如繁星，只係呢幾款叫做係香港相對比較多人用，同埋「埋單」率比較高者。至於可唔可以係上面搵到你嘅另一半，你問我，我只會話「隨緣」。
P.S. 如果你真係咁乖睇到呢到，送多個app俾你，呢個呢，就真係搵浪漫邂逅嘅，你懂的。暗號：Ashley Madison。
