香薰蠟燭有咩揀?

香港人大壓力就出晒名架啦，除咗收工同朋友飲兩杯放鬆下之外，返到屋企都可以製造一個舒服啲放鬆啲嘅環境，忘記晒工作上嘅煩惱。最近小編愛上咗瞓覺前點住香薰蠟燭，聽下歌碌下電話，個氣氛好relax，然後就好快想瞓覺。趁呢個機會同大家分享下有咩香薰蠟燭係又好聞又靚啦。

法式浪漫 — Diptyque

有接觸香薰蠟燭嘅購友應該對Diptyque一啲都唔陌生，因為佢已經有50年歷史，係香氛界好出名，連時尚大帝老佛爺Karl Lagerfeld都係Diptyque嘅Fans。咁多款香薰蠟燭入面最經典最受歡迎嘅一定係Baies 漿果香蠟燭，加入咗保加利亞玫瑰和黑醋栗，完美平衡了花香和果香，清新嘅香甜味，有種少女初戀嘅感覺，好浪漫啊！

澳洲傳承 — Tilley

Tilley 係香港可能冇咁多人認識，但呢個品牌其實創立咗超過150年，以手工香氛皂起家，係澳洲數一數二嘅香氛品牌。小編都係去韓國旅行無意中遇到Tilley嘅蠟燭，一見鍾情就帶咗佢返屋企。Tilley嘅香薰蠟燭冇Diptyque，Jo Malone咁貴，但同樣行高雅精緻嘅路線。小編就好鍾意佢哋玉蘭花混合綠茶嘅香薰蠟燭，係一種淡雅嘅清香，鍾意花香又唔想太甜嘅朋友可以一試。

香港味道 — BeCandle

近年大家開始重視本地小品牌，而BeCandle就係非常本土嘅香薰品牌。創辦人走遍香港去體驗各區獨特嘅氣味，再調製成香薰，仲用咗嗰區嘅名去命名香薰。小編有BeCandle嘅Full City Roasted香薰蠟燭，有好濃嘅檀香木同麝香味，好適合夜晚點住蠟燭飲下紅酒。BeCandle係西貢有鋪位，間唔中有workshop可以報名參加架~

三款唔同風格嘅香薰蠟燭有冇邊款啱心水? 冇都唔怕，小編會繼續入手唔同蠟燭，試完再同大家報告~