講起叉燒，唔知點解梗係會諗起食神果碗黯然銷魂飯 (雖然而家好多餐廳都賣緊)，諗起家燕姐係舊叉燒度碌嚟碌去，再講到舊叉燒點樣外脆內嫩，有豐富嘅肉汁，頂，淨係諗下都流晒口水，但究竟邊度有好味嘅叉燒呀!
之前一直都聽唔同朋友都介紹呢間位於柴灣既新桂香叉燒有幾好食！今日專登過嚟試下！由於之前阿婆都係住柴灣嘅關係，對呢區一D都唔陌生，當一路行去新桂香嘅時候，咦，點解D路咁熟嘅！但到左店面，先發現原來呢間就係細個時阿婆成日帶我嚟買外賣嘅燒味店！
由於到嘅時候已經過晒lunch time，唔洗等就可以直接入去。叫左碟半肥叉飯，拿拿臨手機影兩張就開波！半肥瘦既叉燒燒的剛剛好，周邊微焦更加滋味！平時食燒味飯一定要多色多葱嘅我，由於叉燒汁同白飯已經溝埋一起，第一次沒要求薑葱便KO左成碟飯！一啖叉燒，一啖白飯再一啖冰可樂！我好想好似家燕姐咁大叫「叉燒」呀！好「叉燒」呀！
極速KO後，本身想打包買原條免切叉燒 (買外賣一定要免切，咁樣先可以更好咁鎖住肉汁) 返去俾屋企人食，但腦細話而家得返條肥叉，叫我晏D再嚟，為美食，又點可以唔去盡！一於等！！
