香港政府又收緊限聚令，睇怕年尾都唔會去到旅行㗎啦。不過，又唔洗太唔開心，因為其實留喺香港都可以有好多嘢做，包保你唔會悶！除咗去睇聖誕燈飾、食聖誕大餐之後，仲可以同好朋友或者男朋友一齊參加工作坊，製造獨一無二嘅聖誕裝飾同禮物，創造專屬嘅回憶。
1. 香港有唔少文青花藝店，Pause Rewind n Fastforward 就喺其中一間小編好鍾意嘅花店，佢位於深水埗大南街，平時就專賣乾花，但每到聖誕都會推出一連串嘅工作坊。可以俾你從零開始自己製作一個聖誕花圈，尺寸大約25至40 cm，可以自己設計並提供新鮮及乾燥材料，花圈可以存放一個月以上。
2. 八拾花火喺由一班80 後創立，佢地最出名嘅係「花火瓶」，代表住夢想，如果唔相信自己同堅持去追夢，就永遠只會喺個夢。今年嘅聖誕佢地推出咗保鮮花聖誕樹，細細棵擺喺公司都無問題！
3. 小食堂喺一間位於油麻地嘅廚藝教室，可以學整甜品、麵包、日常料理同咖啡拉花，導師們都有齊由 KOREA FLOWER CAKE ASSOCIATION 發出嘅證書，喺信心嘅保證。喺課堂入面，你可以學識點整聖誕鏡面黑朱古力蛋糕，同埋裱花技巧 (聖誕花，松果，棉花及聖誕葉)，玩得又食得！
4. 小編喺整陶瓷嘅愛好者，成日都好想參加HIUCHI 嘅Regular Class，但奈何太多人，永遠都排唔到我，唯有參加住佢嘅Workshop 玩下先~ 陶瓷鹿角燭台工作坊將教授以手揑技巧做出中空球體及通花技巧，然後可以自選顏色製作雲石紋喺鹿角上面，令本身純白色嘅燭台增添色彩。
5. 拖住疲倦嘅身體，返到屋企沖好涼，小編就會即刻點個蠟燭放鬆下心情。聖誕就梗喺要整下聖誕蠟燭應下景啦！Lightsome Candle 有KCCA 韓國蠟燭工藝協會認證導師，佢除咗蠟燭之外，仲可以整擴香石掛牌同香氛蠟片，外型可愛，啱晒同閨蜜一齊去整啊。
仲唔快啲約埋朋友或者男朋友一齊渡過難忘嘅聖誕節？