[偽食評] 米芝蓮一星中菜餐廳：潤

一坐低首先會上一碟小食，好好味，唔係平時去中菜廳求其俾啲花生，榨菜，而係有烹調過，有特別調製嘅酸梅醬。個醬真係好出色，酸甜得嚟唔會好膩，幾清爽，係碟好唔錯嘅前菜。

食唔到叉燒叫咗燒腩仔，好好味！外皮香脆，肥瘦平均，肉味香濃，而且不會好鹹，10分入面有9分，絕對係會再去食嘅菜式～

咁啱係食蟹嘅季節，叫咗釀蟹蓋，好香，蟹膏份量好足，不過個驚豔程度就冇燒腩仔咁高，我俾7.5分～

呢碟充滿海鮮嘅魚湯好濃香，極度鮮甜，直情想加份陽春麵連埋個湯一齊食，呢個都有9分！

小編好鍾意食豆腐，每次去食中菜都幾乎會叫一份豆腐嘅菜式，今次都唔例外。豆腐炸到外脆內軟，連埋菇一齊食，好香口，有7.5分。

潤嘅環境、服務到菜式都係一流，推薦大家嚟食飯。可惜呢到叫菜冇2人份量可以揀，冇得試多啲菜，下次同多啲朋友一齊食～