對於一眾奴才嚟講，主子們食得開心健康可以話係重中之重，但問題就嚟啦？點先為之一款好嘅狗糧？
坊間好多唔同嘅講法，有人話高蛋白對佢哋先好，易長肉易爆毛。亦有人話高纖維有助吸收。咁問題就嚟啦，究竟咩比率先為之最適合佢哋？
屋企兩隻主子，大仔細細個就食Royal Chain + McAdams (果時第一次養唔識，寵物店點講就點跟）呢個組合維持左大概8個月左右，仔仔都食得健康。係10個月左右就開始幫佢轉成犬糧，而第二隻囡係仔仔大概近1歲時接返屋企，一開始就一齊食Stella （如下圖）兩位主子都冇特別偏食情況，一日兩餐，每餐一糧杯。食左差唔多1年，問題就嚟啦，每次放狗，身邊狗友都會話仔仔好似瘦左同埋囡囡好似唔長肉咁，而我亦發覺佢哋嘅便便同其他狗狗比相對係大督同大條（只係大督同大條，便便係靚便）所以就開始上網研究同埋問下身邊嘅朋友同有經驗嘅人士，得出嘅建議係蛋白同纖維都要有相應嘅比例，有D更複雜嘅文章更會研究埋水份同脂肪比例（但講到尾，我都係懶，所以淨係根據粗蛋白同粗纖維兩個指標去幫佢哋搵新糧）
根據建議，係香港最適合毛孩嘅粗蛋白同粗纖維比例分別係粗蛋白≤25% 及 粗纖維≤4.5%。奴才就跟住呢個指標，再結合WDJ 2023及毛神神 嘅推介，再搵左N咁多間網上商店/寵物用品店（務求容易買同貨源穩定），暫時得出20款分別嚟自7個品牌，係數值上相對接近建議粗蛋白及粗纖維指標嘅Grain Free狗糧（其實應該仲有更多，但奴才實在太懶，本住先試左先就停左繼續搜集）
兩隻毛孩轉左糧大概2星期（本身諗住食羊肉口味，平幾舊水，點知咁岩冇貨，唯有食貴D嘅鹿肉），直接睇到嘅效果係督屎細督左細條左（D屎仲冇咁臭），根據《動物科學雜誌》嘅研究，便量變少的主要原因很可能是因狗狗已消化食物中的大部分營養成分，相對需排出體外的殘渣比較少。如果你都覺得你嘅主子D屎太大督，太臭又或者唔靚嘅，不妨都可以參考下呢個粗蛋白及粗纖維指標建議，搵一款適合你主子嘅狗糧。
